Бүх хүний дундаас хамгийн эмгэнэлт төгсгөлтэй өөр төрлийн хүн байдаг. Эдгээр нь Миний хамгийн дурдах дургүй хүмүүс юм. Энэ хүн Бурханы шийтгэлийг авч байгаа учраас, эсвэл тэдэнд тавих Бурханы шаардлага хатуу бөгөөд тэд эмгэнэлт төгсгөлтэй учраас эмгэнэлтэй биш юм. Харин тэд үүнийг өөрсдөдөө хийдэг учраас эмгэнэлтэй бөгөөд энэ нь: “Тэд булшныхаа нүхийг малтдаг” гэдэг шиг л юм. Энэ ямар төрлийн хүн бэ? Энэ хүн зөв замаар алхдаггүй ба өөрийн төгсгөлийг урьдчилан илчилсэн. Бурхан ийм хүнийг Өөрийн жигшил зэвүүцлийн хамгийн гол бай гэж үздэг. Хүмүүсийн хэлдгээр эдгээр нь бүх хүнээс хамгийн эмгэнэлтэй нь юм. Ийм хүн Бурханыг дагаж эхлэхдээ маш урам зоригтой байдаг; тэд олон төлөөс төлдөг; Бурханы ажлын төлөв байдлын талаар тэд сайн санал бодолтой байдаг; тэд өөрсдийн ирээдүйн тухайд мөрөөдлөөр дүүрэн байдаг; тэд Бурханд нэн итгэлтэй байж, Бурхан хүнийг бүрэн төгс болгож, хүнд гайхалтай сайхан хүрэх газар авчирч чадна гэж итгэдэг. Гэсэн ч ямар нэг шалтгаанаар энэ хүн дараа нь Бурханы ажлын замналаас зугтдаг. Энэ хүн зугтдаг гэдэг нь юу гэсэн үг вэ? Тэд баяртай гэж хэлэлгүйгээр, дуу чимээгүй алга болдог гэсэн үг юм. Тэд үг дуугүй явдаг. Хэдийгээр ийм хүн Бурханд итгэдэг гэж хэлдэг боловч үнэндээ Бурханд итгэх замд үндсээ ерөөсөө суулгаагүй байдаг. Тийнхүү тэд өчнөөн урт хугацаанд итгэсэн мөртлөө Бурханаас нүүр буруулж бас л чаддаг. Зарим хүн бизнес эрхлэхээр явдаг, зарим хүн өөрийнхөөрөө амьдрахаар явдаг, зарим нь баяжихаар явдаг, зарим нь гэрлэж, хүүхэдтэй болохоор явдаг … Явсан хүмүүсийн дунд мөс чанар нь гэнэт хөдлөн буцаж ирэхийг хүсдэг хүмүүс байдаг ба өчнөөн олон жилийн турш энэ дэлхийн урсгалыг даган ихэд бүтэлгүй амьдардаг өөр хүмүүс байдаг. Эдгээр зорилгогүй амьдрагчид нь маш их зовлон амсдаг бөгөөд энэ дэлхийд амьдрах нь хэтэрхий зовуурьтай, мөн Бурханаас салж болохгүй гэж тэд итгэдэг. Тэд гай гамшгаас зугтаж, эсвэл аврагдаж, гайхалтай сайхан хүрэх газарт очихын тулд Бурханы гэрт буцаж очиж, тайтгарал, амар амгалан, баяр хөөр олж авч, Бурханд үргэлжлүүлэн итгэхийг хүсдэг. Учир нь, энэ хүмүүс Бурханы хайр бол эцэс төгсгөлгүй бөгөөд Бурханы нигүүлсэл дундаршгүй, дуусашгүй гэж итгэдэг. Хүн юу хийсэн байх нь хамаагүй, Бурхан тэднийг уучилж, тэдний өнгөрснийг тэвчих ёстой гэж итгэдэг. Энэ хүмүүс буцаж ирээд үүргээ биелүүлэхийг хүсэж байгаагаа хэлдэг. Цаашлаад зарим хүн өөрсдийн зарим эд зүйлсийг хүртэл чуулганд өгдөг ба иймэрхүү арга замаар Бурханы гэрт буцаж очихыг хүсдэг. Ийм хүнд хандах Бурханы хандлага юу вэ? Бурхан тэдний төгсгөлийг хэрхэн тогтоох ёстой вэ? Чөлөөтэй ярьцгаа. (Бурхан ийм төрлийн хүнийг хүлээж авна гэж бодож байсан, гэхдээ яг одоо үүнийг сонссоны дараа тэднийг дахин хүлээж авахгүй байж магадгүй гэж бодлоо.) Чиний үндэслэл юу вэ? (Ийм хүн өөрийнхөө төгсгөлийг үхлийнх байлгахгүйн тулд Бурханы өмнө ирдэг. Тэд үнэхээр чин сэтгэлээсээ ирдэггүй. Харин Бурханы ажил удахгүй дуусна гэж мэддэг учраас буцаж ирээд ерөөл хүртэхээр горьддог.) Чиний хэлж байгаагаар, энэ хүн Бурханд чин сэтгэлээсээ итгэдэггүй, иймээс Бурхан түүнийг хүлээн авч чадахгүй юу? Тийм үү? (Тийм.) (Миний ойлгож байгаагаар, ийм төрлийн хүн нь завшааныг ашиглагчид бөгөөд Бурханд чин сэтгэлээсээ итгэдэггүй.) Тэд Бурханд итгэх гэж ирээгүй; тэд бол завшааныг ашиглагчид. Сайхан хэллээ! Эдгээр завшааныг ашиглагчид бол хүн болгоны үзэн яддаг төрлийн хүн юм. Тэд зүгээр л салхи үлээсэн зүгт хөвдөг ба өөрт нь л ашиггүй бол юунд ч оролцдоггүй. Мэдээж, тэд жигшмээр! Өөр ах, эгч нарт ямар нэг санал бодол байна уу? (Бурхан тэднийг цаашид хүлээж авахгүй, учир нь Бурханы ажил дуусах гэж байгаа бөгөөд одоо бол хүмүүсийн төгсгөл тогтоогдож байгаа үе юм. Чухам энэ үед л эдгээр хүмүүс эргэж ирэхийг хүсдэг. Тэд үнэнийг үнэхээр эрэлхийлэхийн тулд биш; гай гамшиг ирж буйг мэдсэн, эсвэл гадны хүчин зүйлс нөлөөлсөн учраас буцаж ирэхийг хүсдэг. Хэрвээ тэдэнд үнэнийг эрэлхийлсэн зүрх сэтгэл үнэхээр байсан бол тэд хэзээ ч замын дундаас зугтахгүй л байсан.) Өөр санал байна уу? (Тэднийг хүлээж авахгүй. Бурхан тэдэнд боломж үнэхээр өгсөн боловч тэд Бурханд хандахдаа Түүнийг хэзээд тоосон шинжгүй байсан. Энэ хүний цаад санаа ямар байх нь хамаагүй, тэд үнэхээр гэмшиж байсан ч гэсэн Бурхан тэднийг мөн л хүлээж авахгүй. Яагаад гэвэл Бурхан тэдэнд аль хэдийн олон боломж өгсөн атал тэд аль хэдийн өөрсдийн хандлагыг харуулсан: Тэд Бурханыг орхихыг хүссэн. Тиймээс одоо тэднийг буцаж ирэхэд Бурхан тэднийг хүлээж авахгүй.) (Бурхан ийм төрлийн хүнийг хүлээж авахгүй гэдэгтэй би ч бас санал нэг байна, учир нь хэрвээ энэ хүн үнэн замыг харж, Бурханы ажлыг тийм урт хугацааны турш туулсан байтлаа дэлхий рүү буцаж, Сатаны тэвэрт буцаж очсон бол энэ нь Бурханаас айхтар урвасан хэрэг юм. Бурханы мөн чанар нь өршөөл, хайр байдаг нь үнэн боловч энэ нь ямар төрлийн хүн рүү чиглэж байгаагаас хамаардаг. Хэрвээ энэ хүн тав тух хайж, найдаж болох ямар нэгэн зүйл хайж Бурханы өмнө ирвэл, тэрээр Бурханд чин сэтгэлээсээ итгэдэг төрлийн хүн биш бөгөөд тэдэнд үзүүлэх Бурханы өршөөл энэ хүрээд дуусна.) Бурханы мөн чанар нь өршөөл, тэгвэл Тэр яагаад ийм хүнд арай илүү өршөөл үзүүлдэггүй юм бэ? Бага зэргийн өршөөл хүртвэл тэд боломж олж авахгүй гэж үү? Өмнө нь дандаа ингэж хэлэх байсан: Бурхан хүн бүрийг аврагдаасай гэж хүсдэг бөгөөд хэнийг ч сүйрч мөхөөсэй гэж хүсдэггүй. Хэрвээ зуун хониноос нэг нь төөрвөл Бурхан ерөн есийг нь орхиод алга болсон нэг хонио хайна. Одоо энэ төрлийн хүний тухайд бол, хэрвээ энэ нь Бурханд итгэх тэдний жинхэнэ итгэлийн хувьд бол Бурхан тэднийг хүлээж аваад, тэдэнд хоёр дахь боломж олгох ёстой юу? Энэ үнэндээ хэцүү асуулт биш; энэ маш энгийн! Хэрвээ та нар Бурханыг үнэхээр ойлгож, Бурханы талаар бодит мэдлэгтэй бол олон тайлбар хэрэггүй; олон таамаг ч бас хэрэггүй, тийм үү? Та нарын хариулт зөв чигт байгаа боловч Бурханы хандлагаас зөрүүтэй байсаар байна. “Нэгэн бодитой асуулт хүмүүсийн янж бүрийн ичиж зовсон байдлыг ил болгодог” →-ийг үргэлжлүүлэн унш